ചെലവിന് നിയന്ത്രണം: വെളിച്ചെണ്ണയുടെ പുതിയ യാത്ര ചെറിയ കുപ്പികളിൽ

 വെളിച്ചെണ്ണയുടെ വില വൻതോതിൽ ഉയർന്നതോടെ, ഉപഭോക്താക്കളുടെ അടുക്കള ചെലവുകൾക്ക് പ്രഹരമേറ്റിരിക്കുകയാണ്. 

വില ഉയർന്നതോടെ ചെറിയ കുപ്പികളിൽ ലഭ്യമാക്കുകയാണ് നിർമ്മാതാക്കളുടെയും വ്യാപാരികളുടെയും പുതിയ തന്ത്രം. അതിന്റെ ഭാഗമായി വിപണിയിൽ 100 രൂപയ്ക്ക് 200 ഗ്രാം വെളിച്ചെണ്ണ കുപ്പികളിൽ വിപണനം ചെയ്യാൻ തുടങ്ങിയത് ഹിറ്റായി.

വില വർദ്ധിച്ചതിനാൽ ഉപഭോക്താക്കൾ ചെലവ് കുറക്കാൻ കഴിവതും ഉപയോഗം നിയന്ത്രിക്കുന്നതും മറ്റേതെങ്കിലും വിലക്കുറഞ്ഞ എണ്ണകളിലേക്കുള്ള മാറി ഉപയോഗിക്കുന്നതായാ ണ് കാണുന്നത്. 

പാമോയിലിന് ലിറ്ററിന് 123 രൂപയും, സണ്‍ ഫ്‌ളവർ ഓയിലിന് 160 രൂപയുമാണ് നിലവിലുള്ള വിപണിവില.

കഴിഞ്ഞ ഒരാഴ്ചയ്ക്കിടെ വെളിച്ചെണ്ണയുടെ വിലയിൽ 60 രൂപയ്ക്ക് മുകളിലുള്ള വർദ്ധനയാണ് രേഖപ്പെടുത്തിയിരിക്കുന്നത്. ഇതിന്റെ തിരിച്ചടി വിപണിയിൽ പ്രതിഫലിക്കുന്നുണ്ട് — കൂടുതൽ ആളുകൾ ഇപ്പോൾ 200 ഗ്രാം കുപ്പികളാണ് തിരയുന്നത്.

വില കുതിച്ചുയർന്നതോടെ തേങ്ങയുടെ ലഭ്യത കുറവായതും വെളിച്ചെണ്ണ നിർമ്മാണ മില്ലുകൾക്ക് വെല്ലുവിളിയായി. നിരവധി ചെറുകിട മില്ലുകൾ ഉത്പാദനം കുറച്ചതും ചിലത് അടച്ചുപൂട്ടലിന്റെ വക്കിലുമാണ്. 

സഹകരണ മേഖലയിലും വിപണനത്തിൽ വലിയ ഇടിവാണ് രേഖപ്പെടുത്തിയത്. നേരത്തെ നല്ല വിൽപ്പനയുണ്ടായിരുന്നുവെങ്കിലും ഇപ്പോൾ അത് പകുതിയായി കുറഞ്ഞു.

തേങ്ങയുടെ വിലയും കൂടുകയാണ് — ഇപ്പോൾ ഒരു കിലോക്ക് 90 രൂപയാണ് വില. ഈ വളർച്ചയെ തുടർന്ന് ഹോട്ടലുകൾ, ബേക്കറികൾ, വീട്ടമ്മമാർ തുടങ്ങി പലരും പാമോയിലിലേക്കും മറ്റു വിപണിയിൽ ലഭ്യമായതുമായ എണ്ണങ്ങളിലേക്കും ശ്രദ്ധ തിരിക്കുന്ന നിലയിലാണ്.

ഉപഭോക്താക്കളുടെ ചെലവു നിയന്ത്രണത്തിനായി ചെറിയ കുപ്പികളിൽ വെളിച്ചെണ്ണ വിപണനത്തിൽ ഇറക്കിയതിലൂടെ വിപണിയിൽ ചെറിയൊരു ഉണര്‍വുണ്ടായെങ്കിലും, വില കൂടുതൽ ഉയർന്നാൽ ഈ ശ്രമങ്ങളും പരാജയപ്പെടാൻ സാധ്യതയുണ്ട്.

മില്ലുകൾ അടച്ചു പൂട്ടൽ ഭീഷണിയിൽ

കൊപ്രക്ഷാമവും വിലവർദ്ധനവും മൂലം ചെറുകിട മില്ലുകളും അടച്ചുപൂട്ടല്‍ ഭീഷണിയില്‍. ഹോട്ടലുകളും ബേക്കറികളും ഗാർഹിക ഉപഭോകതാക്കളും എല്ലാം വില കൂടിയതോടെ പാമോയിലിലേക്ക് കളംമാറ്റി. 

സഹകരണ മേഖലയില്‍ വെളിച്ചെണ്ണയ്ക്ക് നേരത്തെ നല്ല ഡിമാൻഡായിരുന്നു. എന്നാല്‍ ഇപ്പോള്‍ വില്‍പ്പന പകുതിയായി കുറഞ്ഞിട്ടുണ്ട്. സഹകരണ മില്ലുകള്‍ അടക്കം വെളിച്ചെണ്ണ ഉത്പാദനം പകുതിയായി കുറച്ചു. അതേസമയം, ഒരു കിലോ തേങ്ങയുടെ വില 90 രൂപയായി.